Тод каннам эмнэлгийн эмч нарыг шүүх хурал товлогдлоо

Нийслэлийн Хан-Уул дүүргийн 15-р хорооны нутаг дэвсгэрт байрлах "Тод каннам” эмнэлэгт 2019 оны гуравдугаар сарын 26-ны өдөр өөх соруулах хагалгаанд орсон эмэгтэй амиа алдсан харамсалтай хэрэг гарсан. Энэхүү хэргийг цагдаагийн байгууллагаас шалгаж, хоёр эмчийн хэргийг шүүх рүү шилжүүлсэн. Тэгвэл өнөөдөр Хан-Уул дүүргийн прокурорын газраас Д.Тодномбат, Б.Мөнгөнчимэг нарт холбогдуулан Эрүүгийн хуулийн тусгай ангийн 10.6 дугаар зүйлийн 1 дэх хэсэгт зааснаар яллах дүгнэлт үйлдэж ирүүлсэн эрүүгийн хэргийг Хан-Уул дүүргийн эрүүгийн хэргийн анхан шатны шүүх өнөөдрийн урьдчилсан хэлэлцүүлгийн шүүх хуралдаанаар хянан хэлэлцэв. Ингээд яллагдагч нарыг шүүхэд шилжүүлж шүүх хуралдааныг 2020 оны нэгдүгээр сарын 27-ны өдрийн 12 цагт товлосон байна.