СЭРЭМЖЛҮҮЛЭГ: Нэг ой 5 сартай нярай байшинтай шатаж, амиа алджээ

Хүйтний улирал эхлэхээр гэртэйгээ шатаж амиа алдах харамсалтай хэргүүдийн тоо нэмэгдсээр байна. Өнгөрсөн аравдугаар сард 2-7 насны дөрвөн хүүхэд гэртэйгээ шатаж харамсалтайгаар амиа алдсан хэрэг намжиж амжаагүй байхад дахин нэг ой 5 сартай нярай байшинтай шатаж, амиа алдсан хэрэг гарлаа.

Тухайлбал, 14 дүгээр хороо, Бурхантын 1 дүгээр гудамжинд байшин шатаж байна гэсэн дуудлагыг Шуурхай удирдлагын хэлтэс өчигдөр буюу 2020 оны арваннэгдүгээр сарын 26-ны өдрийн 17:11 цагт хүлээн авчээ. Ингээд дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчид 15 км замыг туулан 17:29 цагт очиж, иргэн Г-ийн 8х8 метрийн хэмжээтэй байшин шатаж байсныг 25 минут ажиллаж унтраасан. Тус гал түймэрт иргэн Ц /1 нас 5 сартай, эрэгтэй/ өртөж нас барсан байсан тул цогцсыг тус дүүргийн Цагдаагийн 2 дугаар хэлтэст шилжүүлж өгсөн байна.

Иймд иргэн та гэр, байшин орон сууцад амьдардаг ч бай галын аюулгүй байдлаа шалгаж, бага насны хүүхдийг хараа хяналтгүй үлдээхгүй байхыг анхааруулж байна.